7 mil kapin miduaw sa Sto. Niño Exhibit

Kapin sa mil ka mga tawo and niduaw sa exhibit sa imahen ni Sr. Sto. Niño niadtong ikduhang semana sa Enero ug nitapos kagahapon.

Si Fr. Dominador Besares, O.S.A. niingon nga wa sila magdahom nga ingon kadaghan nagbisita sa exhibit sa Basilica Museum bisan sa kamubo lang sa panahon.

Ang exhibit nipakita sa mga nagkalainlaing hulagway ug barog sa balaang bata nga si Sr. Sto. Niño ngadto na sa kamatayon ni Jesu Kristo pinaagi sa paglansang sa krus.

Lakip sa mga ningtan-aw sa exhibit mao ang mga tinun-an, mga deboto sa Sto. Niño ug mga turistang lokal ug langyaw.

Kagahapon, usa ka misa pasalamat ang giphigayon sa Basilica Minore del Sto. Niño nga gidumala nila Frs. Andrew Batayola, O.S.A; Carlito Puno ug Besares nga gitambungan sa mga organizer sa kalihukan.

Gipahibalo usab ni Besares nga atol sa Semana Santa laing exhibit ang gipahigayon.

Samtang, lain sa usab nga dakong kalihukan ang ipahigayon sa Basilica nga gitawag og Kaplag o ang paghulagway sa pagkaplag sa imahen ni Sto. Niño sa karong Abril 28.

Ang maong adlaw maoy ika-422 ka tuig nga kasumaran human nga makit-i ang orihinal nga imahen sa Sto. Niño.

Si Louie Nacorda, script writer sa Kaplag, nagkanayon nga ang Sugboanon Heritage Studies Center sa University of San Carlos moabag sa Basilica sa maong kalihukan.

Base sa pasiuna nga nasabutan nga mopahigayon og tulo ka adlaw nga novena sa di pa ang adlaw sa Kaplag ug ang pagpahigayon og re-enactment sa maong kasaysayan.

Gipaabot nga usa ka dance drama presentation ang masaksihan sa mga deboto atol sa pagpahigayon sa Kaplag diha sa Pilgrim Center sa Basilica.

Sa samang adlaw, ilusad ang libro nga nag ulohan og ‘Pit Senyor de Cebu' diin natala ang mga milagro ug personal nga nasinati sa mga deboto.